O mae perché de-o “Dragun”

O l’è o spirito ereditou da quella mae infansia visciûa co-o sentimento che i ommi de questo tocco de mâ m’han trasmisso con tanto amô.

Mainae che in parte no ghe son ciù, ma che pe’ mi continoan a remmâ anche in sce-o “Dragun”, perché o spirito ch’o vive in to remmo a contatto co-o mâ o no meue mai.

L’Imbarcassion

A l’è un’imbarcassion a remme e a veja con e caratteristiche tipiche do Sciabecco e de-a Galea. O scafo de legno o l’è nasciüo in to 1968 da-a trasformassion de ‘na scialuppa de sarvataggio de ‘na nave di primmi do ‘900. A seu stöia a l’è semplice comme o spirito ch’o l’ha animou o seu costruttô Ido Battiston e o gruppo di seu amixi. Grassie a l’ingegno do Ido, questa vëgia imbarcassion ha l’ha piggiou a forma attuale e a l’è ancheu un po’ o scimbolo de Camoggi, di seu abitanti e de-e tradission do mâ che o gruppo de-o “Dragun” o çerca de mantegnî vive.

Caratteristiche de l’imbarcassion:

lunghessa mt. 11 / larghessa mt. 2,60 / pescaggio mt. 0,50 / peizo totale ton. 3 (compreizo l’equipaggio) 

Armamento: 2 erboi a veje latinn-e, 12 remme de 4 mt. de lunghessa e de quaexi 15 Kg. de peizo, 1 timon a bära, 1 tambüo pe’ o ritmo de voga.

A Stöia

O primmo mazzo 1969, fra l’entuxiasmo de tutta a çittadinansa, l’imbarcassion a vegne avaâ. A giusta intuission do Ido e a voentae de tutto o gruppo, che han vosciüo riportâ a-a nobiltae de-a navigassion un vëgio  scaffo scordou da tutti , han conferma in to calore e in te-a simpatia che a circonda o Gruppo ogni votta che o partecipa a manifestassioin folcloristiche pè tutta a Rivéa  Ligure.

Stella Maris

A l’è unn-a tradission in onô do mâ che a se svolge a Camoggi in te-a primma domenega d’Agosto. O “Dragun” o l’è protagonista de-a manifestassion che a veu ricordâ tutte e tradissioin do popolo di mainae e continuâ in to  tempo a stöia de unn-a çittae che a l’ha ancon tanti ligammi con o mâ.

20 Ottobre 1969

In occaxion de l’insediamento do neuvo Parroco, Monscignou Natalin Garaventa, l’è de neuvo o “Dragun” a portâ l’arçipraeve da Söi a-a neuva residensa de Camoggi, via mâ.

20 Mazzo 1970

O “Dragun” o partecipa a-a “Sagra do pescio” (festa patronale de Camoggi dove vegne offerta a frittûa de pescio a tutti i ospiti) con unn-a manifestassion de feughi d’artifissio e evolussioin luminose in mâ, terminando con l’incendio de unn-a Töre Saracena costruïa da-i figgieu do paize in sce-a ciazza. L’entuxiasmo di presenti o l’è o ciù bello riconoscimento pe’ o Gruppo de-o “Dragun”.

Natale 1970  

In occaxion de-e festivitae de Natale, o “Dragun” o fa bella mostra in ciassa Colombo.

19 Zugno 1971

In occaxion de-a festa patronale de Recco, çittadinn-a limitrofa, o gruppo o l’è protagonista de un sbarco piratesco in sce-a ciazza, a rievocassion di reali avvenimenti stöici do passou. De stäe, o “Dragun” o navega da Camoggi a Levanto, çittae da Rivéa de Levante pe’ partecipâ a-e manifestassoin   in onô de San Giacomo. L’esaltante sagoma de l’imbarcassion, con e seu veje e-e remme battenti e calme aegue de-a baia, entuxiasman i leventeixi e i turisti. E luxi de-o “Dragun” daian poi colore a-a serenn-a nuette  de Levanto.

Settembre 1972

In occaxion do venteximo anniversaio de-a pösa do “Cristo di Abissi” in te-a magnifica baia de San Fertöso (unn-a státua  de bronzo raffigurante o Cristo, pösâ a quexi vinti metri de profonditae  pe’ protezze tutte e attivitae subacquee), l’imbarcassione de-o “Dragun” a partecipa a-a suggestiva manifestassion.

In to 1974

O scaffo de-o “Dragun” o l’ha l’onô de trasportâ da Camoggi a l’Abbassia de San Fertöso  unn-a copia de-a státua do Cristo di Abissi che ancheu a se peu ammiâ a l’interno de-a Gëxa de l’antigo borgo.                                  

1976 Pavia/Venessia

A l’e’ a primma grande spedission de-o “Dragun” lungo o sciumme Po, da Pavia a Venessia:  l’imbarcassion a lascia e coste liguri pe’ fäse ammiâ in te-a grande çittae lagunare doppo quaexi 500 Km. de voga. L’è con entuxiasmo e nostalgia che s’arregorda o trionfo de-o “Dragun” durante a regatta stöica in sce-o Canâ Grande. Tutto o gruppo o partecipa a-a grande giöia do Ido che finalmente o vedde realizzou o seu seunno. In questa occaxion i giornali locali precizan che quella strann-a  imbarcassion e quell’equipaggio ch’o voga a-a reversa de-i venessiaen son i primmi foestê che partecipan a-a regatta stöica, doppo 703 anni. I applausi di 80.000 spettatoî lungo o Canâ Grande compensan a fadïga de tutti quelli de-o “Dragun”

In to 1977

L’imbarcassion a vegne  imbösâ grassie a un ingegnoso scistema  de tagge pe’ poeine rexinâ e plastificâ o scaffo.  

I Gossi

Da tempo in to gruppo se sentiva a necessitae de permette, sovratutto  a-i zóveni, de vogâ in sce de imbarcassioin ciù piccinn-e e manezzevoli de-o “Dragun”. Pe’ questo in to 1978, grassie sovratutto a-a voentae e a l’ingegno do Ido, da-o modello de un meistro d’ascia de Portofin, vegnïva ricavou o stampo de un gosso da palio de sei metri, pe’ quattro vogoei. Da-o stampo nasciân poi, in sce ‘na ciassetta de Camoggi trasformâ in cantê, sette gossi in veddro-rexina che con colori e frixi diversi piggian o nomme de altrettanti quartê de Camoggi. L’è grassie a queste imbarcassioin che tanti zóveni de Camoggi se riuniscian in to sport do remmo, vivan o spirito de gruppo e commensan a fâ parte de l’equipaggio de-o “Dragun”. S’insan a organizzâ, in to periodo estivo, varie edissioin do locale “Palio Remmiero”.

1978 BESANCON-PARIGI

Completae  i travaggi de manutension e consolidamento de l’imbarcassion, che son duaê tutto o 1977, se organizza a primma spedission europea, da Besançon a Parigi, lungo i sciummi e-i canaê, pe’  agguantâ a capitale Françeise doppo 750 Km.  E manifestassioin de simpatia e l’ospitalitae son esaltanti comme i urtimi colpi de remmo sott’a-i ponti de Parigi e l’ormezzo a l’ombra de-a Tour Eiffel.    

In to 1979

Durante i preparativi pe-a spedission in Inghiltaera, in sce invito do comitato italian e ligure de l’Unicef, o “Dragun” o l’agguanta Zena da Camoggi pe’ ëse esposto in to salon internassionale de-a nautica e o gruppo o partecipa a-a raccolta di fondi pe’ questa organizzassion.In to meximo anno, doppo un lungo travaggio de restaurassion, vegne inaugurâ a sede do Gruppo in t’un magazzin comunale, de sott’a-a passeggiata a-o mâ.

1980 Lechlade-Londra 

L’imbarcassion a l’è pronta pe-a spedission in sce-o Tamigi. A partensa a l’è da-a ridente çittadinn-a de Lechlade e, doppo quaexi  500 Km.. o “Dragun” o l’agguanta  Londra. A tutti i scindici de-e çittae de sosta, o Ido e i componenti do gruppo se onöan de trasmette un messaggio de paxe da parte do scindico de Camoggi. Pe’ questa spedission ingleise l’Unicef e o Conseggio  d’Europa affidan e proprie bandee a-o scaffo ligure pe’ sottolineâ o spirito de messaggero de paxe de-o “Dragun”. Ogni colpo de remmo in sce-e aegue do Tamigi o serve pe’ vinçe a proberviale riservatessa ingleise. A Londra, sott’a-o Tower Bridge, a scimbolo de-a marineria, i applausi son sinceri e l’entuxiasmo pe-o “legno ligure” o l’è completo. L’è con vëo orgoglio che con unn-a lettia da Buckingham Palace o Gruppo o vegne a savéi che a  Reginn-a Elisabetta a l’ha misso unn-a foto de-o “Dragun” in sce-o Tamigi in t’unn-a  de stansie do palasso.

Stäe 1981

O vintiçinque  de luggio o gruppo o l’è de neuvo presente a Levanto  e pe’-o spettacolo de nuette o l’offre a-a çitttadin-a unn-a testimoniansa de amicissia.

1982 - INGOLSTADT - BUDAPEST

O seunno  o s’è avverou! O “Dragun” o l’insa coscì a ciù lunga, gloriosa e impegnativa impreiza lungo un di sciummi ciù belli d’Europa: o Danubio. A partensa a l’è fissâ da Ingolstadt, in Germania, e l’arrivo a Budapest in Ungheria a traverso de-a Germania, l’Austria, a Cecoslovacchia e l’Ungheria. Grassie a l’aggiûtto e a l’interessamento de-a Region Liguria, de-a Provincia de Zena e do Comune de Camoggi, o “Dragun” o saiâ messaggero de paxe lungo o cammin do Grande Sciumme. L’imbarcassion  a tocca paisi piccin, ma anche grandi çittae comme Vienna e Bratislava. O vegne riçevüo da ogni parte con umanitae e simpatia e o l’arriva a Budapest, in te l’ospitale taera unghereize, doppo vinti giorni de voga düa in sce-o sciumme che, anche se o no l’è ciù bleu, o l’ha sempre affascinou pe’ a seu grandessa e pe’-i mâveggiösi paesaggi tutti quelli che l’han navegou. L’augurio de paxe consegnou a tutti scindici in ti-i arrivi de tappa o l’è un “poster” ch’o raffigura o “Dragun” con queste parolle:

“Remmâ  insemme in sce-e aegue de un grande sciumme càregu de stöia e provâ a pensâ a ‘n’Europa  ch’a scöre sensa frontée verso di mâ de paxe”.

INVERNO 1983

Tutti i cortometraggi realizzae in te-e varie spedissioin son poxitivamente utilizzae in te-e scheue elementari e medie, a uso didattico (quattro scheue de Zena, unn-a de Camoggi, unn-a de Levanto). Questo o l’incoraggia a proseguî in te l’inissiativa comme attivitae no fin a sé stessa, ma utile in to tempo.

In to 1984

O vegne ultimou un lungo e passiente travaggio de raccolta e riprodussion de fotografie de-a stöia de Camoggi, di seu avvenimenti e personaggi. O gruppo o presenta o travaggio realizzou in to ridüto do Teatro Sociale e, doppo, in ciassa Colombo.

1985 OSWEGO - NEW YORK Spedission in te-i Stati Uniti d’America

Doppo  lunghi preparativi, o Gruppo o realizza a spedission oltre oceano, in te-i Stati Uniti, da Oswego a New York, lungo o sciumme Hudson. O viägio o l’è realizzou in collaborassion con a Region Liguria, a Provincia de Zena, o Comune de Camoggi, a Cascia de Risparmio de Zena e Imperia e o l’è battezzou comme a manifestassion d’avertüa de-e celebrassioin Colombiann-e che se concludian in to 1992, çinqeçenteximo anniversaio de-a scoverta de l’America. In te-i Stati Uniti o successo de-o “Dragun” o l’è a-o de sorvia de ogni aspettativa. A comunitae Italo-Americann-a ch’a l’ospita o Gruppo e i çittadin riservan accogliense e ospitalitae caloroxiscime. I giornali e a televixion parlan tutti i giorni de-a spedission; a ogni tappa o gruppo o l’è riçevüo da-i Scindici e da-e autoritae locali. A Albany (capitale do Stato de New York) o Gruppo o l’è ospite de-a Camera e Senato che sospendan e sedute pe’ porze o lö saluto. A New York, doppo un arrivo entuxiasmante sott’a-o Ponte de Brooklin, l’equipaggio o l’è riçevüo da-o vicescindico de-a çittae e da ätre autoritae. O 4 luggio 1985, festa de l’Indipendensa, se parftecipa, in sce de particolari lance a remme, a-a tradissionale regatta internassionale sott’a-o Ponte de Brooklin. Tornando in Italia, o “Dragun” o l’è consapevole che a-o messaggio de Colombo l’è staeto azzuntou quello tradissionale de paxe e solidarietae fra i popoli.  

NATALE 1985

Se realizza, in t’un locale de Camoggi, a mostra fotografica e de-i articoli de giornale do viagio in te-i Stati Uniti e, de seja, a proiession do filmou.

1986 PAVIA-VENEZIA

O l’è o decennale de-a spedission  in sce-o sciumme Po, da Pavia a Venessia, in occaxion de-a tradissionale Regatta Stöica in sce-o Canâ Grande. O viagio o l’è organizzou in mainëa completamente autonoma con l’autofinansiamento e ghe piggian parte numerosi zóveni che vivan entuxiasticamente questa straordinaia avventüa anche se, purtroppo, o Po o l’ha ormai un livello de inquinamento disastroso. O sette de settembre, insemme a-o “Bucintoro” e a-e ciù belle gondole venessiann-e, o “Dragun” o partecipa unn’ätra votta a-a Regatta Stöica ripetendo, in to Canâ Grande, de fronte a quaexi çentomilla spettatoî e in diretta televixiva, o stöico successo de deixe anni primma. Ancon unn-a votta o “Dragun” o realizza un’impreiza  früto  da seu fantazia e de l’impegno do gruppo che rappresentan unn-a straordinaia ricchessa pe-o vive civile e a paxe.

Frevâ 1987

O “Dragun” o partecipa a Torin, in sc-e o Po, a-a tradissionale manifestassion “D’Invern an sel Po”, organizzâ da l’Associassion “Amixi do Po” pe’ sensibilizzâ  in sce-a salvaguardia e a difeisa do ciù importante sciumme italian. Nonostante a temperatüa polare de chinze graddi sotta zero, a-a manifestassion partecipan o “Dragun”, a Disdottonn-a venessiann-a, gruppi folcloristici e paracadutisti

O 1989

O l’è l’anno de-i festezzamenti do ventennale de-o “Dragun”. Fra e numerose inissiative gh’è un incontro ufficiale con l’Amministrassion  Comunale. O gruppo o consegna a-o Scindico de Camoggi un modello de l’imbarcassion da collocâ in to locale do Museo Mainaesco. In to corso de l’anno ghe son i primmi contatti co-e autoritae Sovietiche con l’intento de realizzâ unn-a spedission con l’obiettivo Mosca. Un componente do gruppo o va in te-a Capitale Sovietica pe’ concordâ con e Autoritae Locali l’organizzassion do viagio, proscimo obiettivo da agguantâ

SETTEMBRE 1989

A-a  festa nassionale de “L’Unitae” che a s’è svolta a Zena o “Dragun” o partecipa a-o spettacolo finale “Divertimento in Marinn-a”.  Accompagnou da-e muxiche de G.F. Hendel e A. Stradella, o “Dragun” o porta o saluto a un pubblico strabocchevole.

OTTOBRE 1989

O “Dragun” o partecipa in te-e aegue portuali de Zena a-o “Columbus Day” insemme a-e navi scheua Amerigo Vespucci e Caio Duilio. L’imbarcassion ch’a l’ïsa e veje colombiann-e a guida un corteo de barche a remme e a consegna a-o Scindico de Zena e a numerose ätre autoritae e personalitae l’aegua do Mediterraneo che a l’andiâ a alimentâ a Fontann-a  Colombian-a.

1990 – Fëa de l’Orchidea

O “Dragun” o partecipa a-a fëa  internassionale de l’orchidea de Zena. 

In to 1991

O scaffo de-o “Dragun”, vegio de ciù de çent’anni o l’ha beseugno de urgenti travaggi de restauro e consolidamento. Vegne organizzâ unn-a sottoscrission popolare pe-o finansiamento di travaggi che in to frattempo han inissio.

In to 1992

I gossi da regatta do gruppo  portan o saluto de Camoggi a-e navi scheua a veja de tutto o mondo in partensa pe-a regatta colombiann-a.

Stäe 1996

Con passcion e entuxiasmo, o Ido o porta a termine i travaggi a-o “Dragun”. A primma domenega d’agosto se peu coscì de neuvo partecipâ  a-a tradissionale procescion de-a Stella Maris. L’è con entuxiasmo e gioïa che a gente a saluta de neuvo o ritorno in mâ de-o “Dragun”. A-a  seja, durante a tradissionale pösa  in mâ di lummin in memoia de-i mainae che no ghe son ciù, o “Dragun” o torna a entuxiasmâ a gente con e seu evolussioin pirotecniche de fronte  a-a passeggiata in sce-o mâ, a scimboleggiâ a continuitae de-e tradissioin e de-a vitta.

Settembre 1996

O l’è o ventennale de-a primma partecipassion a-a tradissionale regatta stöica in sce-o “canâ grande” a Venessia.O “Dragun” o ghe partecipa de neuvo, voendo coscì proseguî da Venessia a tradission mainaesca de-a voga a remme, messaggio de paxe e esempio poxitivo pe-i zóveni de-a quae o gruppo o l’ha sempre vosciuo ëse portatô. 

Natale 1996

Durante e-e festivitae natalissie, o “Dragun” o torna, co-i seu colori, frixi, veje, armatua, in Ciassa Colombo. A l’è ascì l’occaxion pe’ espöne, in sce di pannelli, a stöia e a scintexi fotografica do gruppo e de l’imbarcassion. 

A Sestri Levante 

In to meize de zugno o “Dragun” o partecipa, a Sestri Levante, a-o premmio internassionale Andersen. L’imbarcassion a l’arve e celebrassioin con unn-a  evolussion de neutte, con feughi, luxi e colori in te-a Baia de-e Föe, durante o concerto de Edoardo Bennato. O “Dragun” o vegne poi tiöu e portöu a forsa de brasse in sce-a Ciassa do Comune de Sestri Levante, dove o resta esposto in bella mostra pe’ tutti i giorni do premmio. O gruppo o l’approfitta de-a presensa a Sestri Levante pe’ partecipâ  a-a tradissionale Barcarollâ  do meize de agosto. Durante a festa un spiaxevole inissio de incendio o danneggia a pröa  e un-a veja do “Dragun”. Ascì se pin d’acciacchi, o “Dragun” o compie egualmente due evolussioin in te-a stupenda Baia do Silensio, reisa magica da un-a artistica illuminassion e da un enorme pubblico ch’o l’incoraggia con un caloroxiscimo applauso l’equipaggio de-o “Dragun”.

STELLA MARIS 1997

Tornou  a Camoggi, o “Dragun” o l’è de neuvo protagonista de-a purtroppo poco valorizzâ Stella Maris. O “Dragun” o l’arve a significativa procescion de barche e o l’entuxiasma de neuvo, a-a seja, durante a tradissionale pösa di lummin, i numerosi çittadin e turisti.

Ottobre1997

Doppo quaexi trent’anni de existensa e attivitae basae in sce l’accordo verbale tra i aderenti, se costituisce ufficialmente l’Associassion denomminâ “Gruppo O Dragun”. I soci fondatoi provvedan a nomminâ e primme c áreghe de Commodoro, Scrivan, Casciae.

Inverno 1997

O scaffo do “Dragun” o necessita de neuvi travaggi de manutenscion. Sott’a guidda ingegnosa do Ido vegne restaurâ a pröa, cangiou tutto o sartiamme e-e due veje de l’imbarcassion.

Mazzo 1998 - STRASBURGO

In occaxion de-a settimann-a de-a Region Liguria a Strasburgo, sede do Parlamento Europeo, o “Dragun”, vogando in te-i splendidi canae de-a çittae alsassiann-a e sott’a l’avveniristico palasso do Parlamento Europeo, o partecipa a un ricco programma de inissiative organizzae da-a Region Liguria. “Perchè l’antigo orgoglio de-a nostra gente de mâ o no vadde scordou”..... o l’è o messaggio che o gruppo o porta, doppo trent’anni de viagi e avvetüe, a unn’Europa che a no doviâ basäse solo in sce parametri economici, ma ascì in sce valori umaen e sociali.

Luggio 1998 - Sestri Levante.

  In sce invito de l’organizzassion, o “Dragun” o partecipa de neuvo a-a tradissionale “Barcarollâ” in te-a Baia do Silensio de Sestri Levante.  In t’unn-a sejâ magica, con un gran numero de partecipanti a-a sfilâ, o “Dragun”, con e seu incorscioin piratesche de feughi e luxi, o porta o salüo a unn-a tradissionale festa de-a çittae con antighe tradissioin mainaesche. 

Stella Maris 1998

 A-o rientro a Camoggi, o no peu mancâ a-a tradissionale procescion de-a Stella Maris in te-a primma domenega de agosto e a-a fiaccolata de neute.

 1999 Las Vegas

 In to  deserto do Nevada, a Las Vegas, a vegne ricostruïa, abbinâ a un mega albergo/casinò, a çittae  e antiga Repubblica Mainaesca de Venessia. O “Dragun” che in ben tre occaxioin o l’ha sfilou in to Canâ Grande de Venessia, o seunna de portâ, remando in questa neuva fantaziosa riprodussion in taera americann-a, e antighe tradissioin mainaesche de-a taera ligure. L’occaxion a peu ëse abbinâ a l’avertüa, in te-a “Little Venice” de Las Vegas, da parte do famoso ristorante zeneize “Zeffirin” de un neuvo locale. Vegnán cacciae e basi pe’ abbinâ o viagio do “Dragun” a-a valorizzassion de-a tradission gastronomica italiann-a a unn-a  originale occaxion de immagine pe-a Liguria e pe’ Camoggi. Pe-a fattibilitae do viagio devan comunque ëse verificae e dimenscioin e a profonditae di canae.

 1999 STELLA MARIS

 O forte attaccamento a-a tradission mainaesca de Camoggi o se celebra anche quest’anno in te-a festa de-a Stella Maris. Ancon unn-a votta o “Dragun”, con a bordo o Parroco de Camoggi, o l’arve a suggestiva procescion de barche pavesae da-o porticciollo de Camoggi a-o speron roccioso de Punta Ciappa, dove a l’è celebrâ a Messa. A-a seja se ripete o spettacolo di lummin colorae e de-e evolussioin e fiaccolate de-o “Dragn” che entuxiasman çittadin e turisti.

 TALL SHIPS 2000

 Da Zena, piggia de neuvo o via a manifestassion vejïca internassionale  che a portiâ dexenn-e de grandi velieri con a bordo miggiae de zóveni verso unn-a regatta transoceanica.O “Dragun” o l’è in to porto antigo de Zena pe’ consegnâ a-i comandanti de-e reginn-e do mâ a “sporta do mainâ” con o contegnüo scimbolico do pan, comme regallo de-a natüa, do vin, comme regallo do sô  e de-a fadiga de l’ommo e, in ciù, unn-a pergamenn-a de salüo tradüa in sette lingue.     

XLV Regatta de-e Repubbliche Mainaesche

Gh’è ascì o “Dragun” a incoraggiâ l’armo do galeon de-a Superba che, comme l’anno passou a Venessia, o vinçe ascì l’edission zeneize da regatta che a se svolge in t’unn-a tradissionale cornixe de entuxiasmo e partecipassion de-a gente. 

Mazzo 2000  -  Travaggi in te-a sede

O tempo e-e infiltrassioin d’aegua rendan necessaia unn-a drastica restrutturassion de-a sede de Via Garibaldi. O Commodoro Ido, assemme a-o gruppo, riportan a-o splendore a stöica sede de-o “Dragun” che a vegne inaugurâ durante unn-a simpatica çeimonia, presenti autoritae e çittadin.

STELLA MARIS 2000

Nonostante o mâ agitou, o “Dragun”, a forsa de remme, o l’arve a procescion de barche verso a scheuggëa  de Punta Ciappa, dove a l’è celebrâ a messa in memoia de tutti i naviganti scomparsi. Doppo a çeimonia, un scimpatico brindisi o l’è offerto a l’equipaggio da-i amixi do Ristorante Stella Maris. A-a seja gh’è a tradissionale evolussion de feughi e fiaccole, un appuntamento che, pe’ a seu originalitae, o l’atttïa in sce-o lungomâ de Camoggi  miggiae de personn-e.

Settembre 2000  -  Nöi

O Comune de Nöi o l’invita o “Dragun” a festezzâ e reixe stöiche  de-a belliscima çittadinna, consciderâ a quinta Repubblica Mainaesca. O “Dragun” o se esibisce con a tradissionale fiaccolata de neutte e con a partecipassion de l’equipaggio, remme in spalla, a-o corteo pe-e vie çittadinn-e e ascì faxendo da cornixe in to tradissionale palio remmiero de-i rioin de Nöi.

ATLANTICO - MEDITTERRANEO

2001 – BORDEAUX – GRISOLLES

Sostegnüo da-o spirito de avventüa e da l’entuxiasmo de sempre, o gruppo o l’organizza un neuvo viagio in taera françeise, da-a çittae de Bordeaux a-a çittae mediterranea de Marseggia, percorrendo a forsa de remme l’antigo e affascinante Canal du Midi. In te-a stäe do 2001 a vegne percorsa a primma parte de l’avventüa, da Bordeaux a Grisolles. Da tutte e parti l’accogliensa e l’ospitalitae son caloroxiscime; autoritae e çittadin son affascinae da-a barca ligure e da-a seu stöia. Durante i incontri ufficiali o gruppo o consegna o messaggio de salüo do scindico de Camoggi e a “sporta do mainâ” che a contegne i prodüti tipici de nostre taere: o pesto, e anciöe saê, e gallette, o vin e ascì publicassioin de-a nostra stöia e de-e nostre tradissioin. O “Dragun” o l’è lasciou in consegna a-i amixi do club remmiero  de Grisolles pe’ repiggiâ l’avventüa in te-a stäe successiva.

2002 GRISOLLES _ MARSIGLIA

A segonda parte  de-a spedission a l’insa o quattorze de luggio, Festa nassionale françeise con a fiaccolata de neutte pe’ ringrassiâ a çittae de Grisolles ch’a l’ha ospitou a barca pe’ tutto l’inverno. O percorso o se presenta molto ciù impegnativo de l’anno passou lungo o Canal du Midi, i canae de-a Camargue, de-a Provensa e due tappe in mâ. O “Dragun” o l’attraversa zone con grandi insediamenti industriali e fantastiche zone naturali, un paesaggio ideale pe-o messaggio ecologico de armonia fra e attivitae umann-e e a tutela e o rispetto de-i grandi cetacei che vivan in to nostro mâ. O “Dragun” o l’arriva a Marseggia doppo avei percorso quaexi 750 chilometri attraverso 150 chiuse in 25 tappe. O “Dragun” o torna a ripösâ in sce-i “poèi” de-a ciazza de Camoggi, pronto pe’ neuve avventüe.

2004

In to 2004, Zena a l'è a capitale Europea de-a coltüa. O Gruppo o progetta unn-a spedission a remme da-a cittae de Lille a Bruxelles. Purtroppo e condissioin de salute do Ido Battiston se aggravan  e o Gruppo o no se sente moralmente e spiritualmente in graddo de fâ o viagio sensa o Cappo. A spedission a vegne rinviâ.

O DRAGON IN SCE INTERNET

Òua O Dragun o voga ascì in sce Internet e da tutto o mondo se peu percurrî  a stöia do Gruppo che a l'è tradüta ascì in ingleize e françeisze e in te-a lingua offissiale do Ido, o Zeneize.

STELLA MARIS 2005

Pe' a primma votta  o Dragon o parteçipa a-a tradissionale festa de-a Stella Maris sensa o Ido a-o timon a impartî i ordini de voga. L'equipaggio o veu ben figurâ pe' dâ a-o Ido, ch'o segue ogni operassion da taera, fieressa e orgheuggio pe' o sò Gruppo.

A SCOMPARSA  DE-O  IDO BATTISTON

Doppo avei lottou comme un lion pe' a vitta, contra o mâ, o 7 ottobre 2005, a 67 anni, o Ido o ne lascia. Se n'è andaeto l'ommo do Dragon, o Cappo, campion de umanitae, un protagonista ch'o l'ha faeto tanto pe' a comunitae e pe' a sò amâ Camuggi. O Cappo o saia insostituibile; o compito do Gruppo e de quanti gh'han vosciou ben o saia quello de onoräne a memoia, de no desperde e trasmette o patrimonio de spirito e de opere che o Ido o l'ha lasciou.

L'OMMO E O DRAGON

Un giorno, o Luci Senes (un di senatoî do Dragon) o l'ha pensou che l'ëa öa de mette in ordine i tanti arregordi e documenti spantegae de-a stoia do Gruppo e o l'ha proposto a-o professô Silvio Ferrari, illustre camoggin, de scrive un libbro. Grassie a-o coinvolgimento ideale e a-e straordinaie capaçitae de Silvio Ferrari, "L'ommo e o Dragon" o l'è diventou un primmo atto pe' onorâ a memoia do Ido; un documento scrïto de unn-a comunitae e un capitolo de-a gloriosa tradission e coltüa do mâ de Camoggi.

SAN FORTUNOU 2006

 I figgieu de-i quartê Porto e Pinetto han deciso de unî i lô sforsi e de trasformâ  pe'  quest'anno a lô sann-a rivalitae in collaborassion. L'han faeto pe' arregordâ e pe' onorâ a memoia do Ido realizzando un unico fôu raffigurante a barca de-o Dragon ch'a piggiâ feugo pe' poi tornâ a risplende e a navegâ, quella vëa, in te-e aegue de Camoggi e do mondo.

STELLA MARIS 2006

Un coordinou travaggio de organizzassion o valorizza a tradissionale festa de-a Stella Maris. Grande partecipassion a-a procescion de barche impavesae che, comme da antiga tradission, doppo anni a l'è de neuvo saluâ da-o sparo de 21 corpi e da-o festoso paveise pe' e vie do borgo marin. Doppo a fonsion religiosa, Punta Ciappa a se anima pe' tutta a giornâ con varie inissiative fra e quae un-a bella mostra de foto istoiche. A-a seia, unn-a singolare procescion de barche illuminae, con in testa "O Dragon", a fa retorno a Camoggi. 

VENESSIA 2006

Zeneizi e Venessien se incontran in Lagunn-a. Doppo o 1976 - 1986 - 1996, "O Dragon" o retorna a-a Regatta Stoica in Canal Grande, a Venessia. Ancon un-a votta l'entuxiasmo pe' o barco ligure o l'è a-e stelle. O neuvo successo in Canal Grande o l'è dedicou da l'equipaggio, con ripetüi "isa-remme", a-o Cappo Ido. In ti giorni precedenti a-a Regatta, "O Dragon" o guagna a remme e isoe de Muran, Buran e Torcello in ta quae Basilica a vegne missa unn-a targa in legno d'oia in memoia do Ido.

2007  -  TRAVAGGI  A-O DRAGON

I danni provocae da-o tempo e da-e infiltrassioin d'aegoa e da-a scistemassion in sce-a ciazza, han bezeugno de un neuvo intervento de manutension straordinaia. O barco de-o Dragon o saiâ curou da-o Gruppo e riportou a neuva vitta con l'amô e o spirito che o Ido o l'ha trasmisso. Pe' o futuro a stà meuiando l'idea de ormezzâ  O Dragon, riportou a neuvo lustro, in sce-a terrassa do ristrutturou vegio mercou, in t'un spassio riqualificou do istoico  Museo Martittimo, testimonio de-a straordinaia tradission e coltüa do mâ de Camoggi. In t'un spassio da dove poi, in moddo agile, poei partî verso neuve avventüe